ABASIRAAMU ababadde bakung'aanye okwetaba mu kusaala okusookedde ddala okuva lwe baggyewo omuggalo ku masinzizo bakiguddeko Poliisi bw'ebasazeeko n'ebalemesa okusaala.
Bano ababadde bakulembeddwamu Omwogezi w'amasiga Sheikh Siraje Mudde babadde bazze okusaalira ku ttaka lino eririko endoliito eriweza square miles 2 e Bukiragi mu ggombolola y'eNtuusi e Sembabule nga lyatundibwa abakulembeze ku Uganda Muslim Supreme Council eri Justus Kyabahwa nga baagala liddire obusiraamu.
Abasiraamu beegattiddwako abakulembeze okuli kansala omukyala ow'eggombola y'emijwala Jolly Kasande ne Patrick Nkalubo eyeesimbyewo ku bwa Sentebe wa Disitulikiti eno ne beegayirira Poliisi ereme kubagumbulula wabula basaale n'esambajja okusaba kwabwe.
Akulira ebikwekweto ku Poliisi eSembabule Andrew Akanyijuka agambye nti baafunye ekiwandiiko okuva ku Uganda Muslim Supreme Council ekisaba Poliisi okulemesa abasiraamu bano okusaalira ku ttaka lino nti balina ebigendererwa ebirala n'abasindika ew'omubaka wa Pulezidenti agonjoole ensonga zaabwe……Bya Maria Nakyeyune